Um verkefnaskil
Þegar þú skilar af þér verkefnum sem þú vinnur í tengslum við nám þitt, er sniðugt að huga aðeins að skjalaforminu og nafni skjalsins.
1) Yfirleitt sniðugt að skila skjalinu á þannig formi að aðrir eiga erfitt með að breyta skjalinu. PDF skjöl eru þar algengt og viðurkennt form og sniðugt að halda sér við það. Flest forrit geta vistað skjöl sem PDF skjöl: Save As… og velja svo PDF úr felli listanum „File type“. Ef sá möguleiki gefst ekki er vert að prófa prentskipunina og velja „prentara“ sem heitir eitthvað sem inniheldur PDF, ef það vantar þá má sækja slíkan hugbúnað hér.
2) Í þeim tilfellum sem notkun ritvinnsluforrita og notkun gagnagrunna við meðhöndlun heimilda kemur inn í námsmat er nauðsynlegt að skila verkefninu á formi ritvinnsluforritsins, t.d. Word formi.
2) Notið viðeigandi form á skjalinu. Í háskólanámi eru nemendur að þjálfa sig í því að láta frá sér fagmannlega unnin skjöl – enda skiptir það miklu máli í atvinnulífinu.
- Einkunn fyrir ytra form verkefna getur numið allt að 30% af einkunn. Því er nauðsynlegt að huga að ytra formi skjalsins. Þar koma til skoðunar: Stafsetning textans, titilsíða, sjálfvirkt efnisyfirlit (þegar verkefnið er kaflaskipt), fyrirsagnir (notið t.d. alltaf snið/styles til að stjórna útliti fyrirsagna), blaðsíðuhaus og blaðsíðufót með blaðsíðutali, tilvísanir í heimildir og heimildaskrá.
- Hluti af öllum námskeiðum við háskólann er að skila texta þar sem höfundur á í einhverju samtali við efni eftir aðra höfunda. Það sem skiptir þar máli er að vinna þín með heimildina sé gagnsæ, greinandi og gagnrýnin og að þú vísir alltaf til til heimilda þinna og gerir það á viðurkenndan hátt. Við Menntavísindasvið förum við eftir sniði Bandarísku sálfræðinga samtakanna: APA. (Sjá leiðbeininngar hjá ritverinu)
- Ritvinnsla er nokkuð sem tekur mikið rými í háskólanámi en líka í starfi kennara og annarra „þekkingarstarfsmanna“. Þess vegna verður ritvinnsluforrit eitt mikilvægasta verkfærið þitt: Stefndu að því að kunna á það til hlítar! Sjá t.d. leiðbeiningar hér.
3) Nöfn skjala greina þau hvert frá öðru. En þegar kennari fær skjöl frá fjölda nemenda um sama verkefnið fyllist jafnvel ein mappa af skjölum sem heita flest “verkefni1.docx” – þá verður erfitt að greina verkefni einstakra nemenda hvert frá öðru. Þess vegna ættir þú að venja þig á að merkja öll skjöl með nafni þínu og lýsandi texta um innihald skjalsins. Þar að auki er gagnlegt að nota enga íslenska bókstafi í nafninu. Því þeir geta oft eyðilagst þegar maður flytur skjöl á milli ólíkra kerfa. T.d. úr Apple umhverfi yfir í Windows eða af einhverju kerfi á vefnum eins og námsumsjónarkerfi yfir á Windows eða Apple tölvur. Þess vegna er rétt að koma sér upp gagnsæju kerfi fyrir nöfn á skjölum, þannig að þú og kennarinn þekkið verkefni auðveldlega í sundur. Dæmi: NafnidThitt-Namskeidsnumer-Verkefnisnafn.docx eða Hrobjartur-KEN101-SagaStarfsnams.docx
Sem sagt
- Skiliið skjölum til annarra gjarnan á PDF formi
- Skilið verkefnum þegar við á sem ritvinnsluskjölum (*.docx)
- Hugið að snyrtilegu fagmannlegu formi (titilsíða, fyrirsagnir, heimildaskrá o.s.frv.)
- Gefið skjölunum gagnsæ nöfn, með ENGUM íslenskum stöfum.
Dæmi: NafnidThitt-Namskeid-Verkefni.pdf, eða HrobjarturArnason-KEN101-Ritgerd.pdf
Skildu eftir svar
Þú verður að skrá þig inn til þess að rita athugasemd.